Пуш уйăхĕн 30-мĕшĕнче Çĕрпӳ хулинчи пĕтĕмĕшле пĕлÿ паракан 2-мĕш вăтам шкулта чăваш чĕлхипе литература вĕрентекенĕсен «Чăваш тĕнчи паян тата ыран» темăпа регионсен хушшинчи наукăпа практика конференцийĕ иртрĕ. Унта Чăваш патшалăх университечĕн вырăс тата чăваш филологийĕпе журналистика факультечĕн доценчĕ Г.Г. Ильина, Пушкăрт республикинчи Пелепейри чăваш гимназийĕн вĕрентекенĕсем, Чăваш наци конгресĕн ĕçтешĕсем, хамăр республикăри шкул учителĕсем хутшăнчĕç.

«Кулăш, ĕçре пулăш!» теççĕ чăвашсем. Ака уйăхĕн 1-мĕшĕнче иртекен уява, календарьте хĕрлĕпе паллă туман пулин те, пирĕн факультетра чăн-чăн уяв вырăннех йышăнаççĕ. Вĕренӳре, тĕрлĕ ĕç-хĕлре пĕр шухăшлă пулни куллен пулăшса, хавхалантарса пынине факультетра кашниех аван ăнланать.

Пуш (март) уйăхĕн 28-мĕшĕнче вырăс тата чăваш филологийĕпе журналистика факультетĕнче Ĕç çынни çулталăкне халалланă сăвă-юрă конкурсĕ иртрĕ. Аслă поэтăмăр Кĕçтенттин Иванов тĕпелĕ çак кун кĕвĕпе сăмах тĕнчине кăмăллакансене, хура çĕрĕн техĕмне туякансене, асамлă вăйне уякансене пуçтарчĕ.

Факультетри чăваш уйрăмĕнче ăс пухакан студентсем вĕренӳре кăна мар, сцена çинче те хастарлăх кăтартаççĕ. Акă нумаях пулмасть Галина Скворцова режиссер ертсе пыракан Халăх театрĕ Н. Сидоров пьеси тăрăх лартнă «Пуçа килсен – пуçана» ятлă спектакльпе куракан умне тухрĕ.

Чăваш наци конгресĕ Чăваш Ен экономика аталанăвĕн министерстви пулăшнипе пуш уйăхĕн 26-мĕшĕнче Шупашкарти филармони залĕнче регионсем хушшинчи «Кĕмĕл сасă – 2016» фестиваль ирттерчĕ.

Пуш уйăхĕн 19-мĕшĕнче чăващ тата вырăс филологийĕпе журналистика факультетĕнче «Сенкер инçет» олимпиадăн пĕтĕмлетӳллĕ тапхăрĕ иртрĕ. Унта раштав уйăхĕнчи онлайн-ăмăртура палăрнă 96 шкул ачи хутшăнма кăмăл турĕ.

Чăваш Енри Ĕç çыннин çулталăкне тата Чăваш чĕлхи кунне халалласа Чăваш патшалăх гуманитари ăслăлăхĕсен институчĕ, Чăваш Республикин вĕренÿ институчĕ, «Хыпар» хаçат редакцийĕ, Чăваш наци радиовĕ, Чăваш наци телекуравĕ, И.Я. Яковлев ячĕллĕ Чăваш патшалăх педагогика университечĕ тата И.Н. Ульянов ячĕллĕ Чăваш патшалăх университечĕ «Пĕтĕм чăваш диктанчĕ - 2016» акци ирттересси çинчен пĕлтереççĕ.

Пирĕн факультет вĕрентекенĕсем университет тулашĕнчи тĕрлĕ мероприятисене те хастар хутшăнаççĕ. Акă, нарăсăн 29-мĕшĕнче Шупашкарти ача-пăчапа çамрăксен библиотекинче краеведени пайĕн пуçлăхĕ Э.Н. Малеева ертсе пынипе Елен Нарпи çырнă «Пăрлă шыври хĕвел пайăрки» кĕнеке тăрăх вулав-çавра сĕтел ирттерчĕç.