Раççей почти пĕтĕм çĕршывĕпех диктант çырмалли ятарлă ручкăсем салатма пуçларĕ. «Berlingo» фирма парнеленĕ 300 пин ручкăна поездсемпе те самолетсемпе 526 ял-хулана çитерĕç. Йĕркелӳ комитечĕ палăртнă тăрăх, кăçал пĕтĕм тĕнчипе пурĕ 250 пине яхăн çын диктант çырма ларĕ.
«Ăс-хакăлпа пĕлӳлĕх» ручкисем Шупашкара та килсе çитрĕç, вĕсене диктант çырнă кун валеçĕç.
«Раççей почти» управленийĕнче пĕлтернĕ тăрăх, пуш уйăхĕн 21-мĕшĕнче вара диктант логотипне ӳкернĕ конвертсем те пичетленсе тухнă, кĕçех вĕсем пĕтĕм çĕршывĕпех вĕçсе саланĕç.
Ку конвертсене пирĕн республикăн тĕп хулинче те кĕтеççĕ. Ака уйăхĕн 13-мĕшĕнче диктант ирттермелли тĕп площадкăра – И.Н. Ульянов ячĕллĕ Чăваш патшалăх университетĕнче – çав конвертсем çине ятарлă сувенир штемпельне çапма хатĕрленеççĕ. Кăмăл тăвакансем тата чăн-чăн çыру çырса, ăна диктант конвертне чиксе, куçса çӳрекен почта ещĕкне яма пултараççĕ.
Тĕп хуламăрти автобус-троллейбус чарăнăвĕсенче диктантăн илемлĕ афишисене курма пулать. Пуш уйăхĕн 28-мĕшĕнче «Шупашкар» универмаг умне виçĕ ятарлă автомобиль – Диктант караванĕ – килсе çитĕ, вăл хăйĕн çулçӳревне пуш уйăхĕн 11-мĕшĕнче Владивостокран пуçланă та ака уйăхĕн 13-мĕшчен Таллин таран çитме палăртнă.
Пĕтĕм тĕнчере иртекен вырăс чĕлхи диктанчĕн регистрацийĕ ака (апрель) уйăхĕн 3-мĕшĕнчен пуçланать. Диктант çырма тăрăшсах хатĕрленекенсем totaldict.ru сайтри онлайн-шкулта вырăс чĕлхи правилисене аса илме, пĕлĕве çирĕплетме пултараççĕ. Çавăн пекех И.Н. Ульянов ячĕллĕ Чăваш патшалăх университетĕнче (Университет урамĕ, 38-мĕш çурт) кашни эрнекун «Русский по пятницам» занятисем иртеççĕ, вĕсем 18.00 сехетре 528-мĕш аудиторинче пуçланаççĕ.
Чăваш енре вырăс чĕлхи диктантне ирттерес-йĕркелес ĕçе «Советская Чувашия» хаçат редакцийĕ те хастар хутшăнать.
